"أنا راجل لعين يا أخي .. أنت مالك!!"
الصورة ده بالنسبة لي تتبع الكوميديا السوداء...
رد الفِعل ده اكيد بتقابله في حياتك سواء انت قولته لحد او حد قاله لك او لغيرك. رغم انها مضحكة و تحس انك حُر و انت بتقولها لكن هي بتدل على حاجة مهمة جداً ان عم الشيخ اللي كان بيحاول ينصحه ده فشل بمعنى الكلمة انه يؤمر بالمعروف و ينهي عن المنكر !!
اكيد عم الشيخ قعد على قلبه يزن يزن و يهلك لحدما فصله و قرفه و عشان يخلص منه طلع له اي حجة عشان يخلص من شكله... عم الشيخ ده ممكن يكون انا او انت او اي حد ماشي في الشارع نفسه ينصح غيره بس يا ميت خسارة بدل ما ينصحه نفّره اكتر
لو كنت انت عم الشيخ ده او نفسك تبتدي في سكة الدعوة الصحيحة، اوعى تضغط على حد و افتكر ان كل واحد حُر يعمل اللي هو عاوزه
خلقتم لتعبدوا الله لا لتحاسبوا الناس
افتكر ان مهمتك الأصلية هي عبادة الله وحده لا شريك له و تجاهِد نفسك و تنوّر بصيرتك، و بعد كده تعين غيرك على حاجته... تقدر توعّي الناس و توسّع مداركهم.. لكن ماتقدرش تجبرهم و تخليهم يعبدوا ربنا غصب عنهم !!
خليك الشخص اللي وجودك بس في المكان منغير ماتتكلم كلمة يعمل تأثير ايجابي على اللي حوليك، واحد مكسوف يطلع سيجارة و انت واقف معاه، او مكسوف يشتم و يسب عشان عارف انك مش بتحب كده، او او او.. و هكذا
تذكر يا عزيزي ...
إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَنْ يَشَاءُ. سورة القصص
