كان نفسي اعيد في بلد منغير فساد ولا جهل و لا رشوة و لا حرب, بلد فيها كل حاجة, بلد قوية جداً يخاف منها أي عدو. كان نفسي اجيب كل حاجة حلمت بيها و أنا صغير و ابويا قاللي لأ. كان نفسي اكون شاطر و اطلع الأول على المدرسة و في نفس الوقت يكون ليا صحاب كتير و اخش الجامعة الأمريكية و اتجوز واحدة اجنبية و اطلع جنسيه تانية و العب بالدنيا لعب. كان نفسي اجيب أي فون و بلا ستاشن من و أنا صغير. كان نفسي اكون قوي جداً و عضلاتي تخوف كل الناس مني. كان نفسي اتولد في بُقي معلقة من ذهب.
القضية مش في أنت نفسك في ايه, القضيه في أنت قدرت تحقق ايه. لو اتولدت فقير دِه مش مشكلتك لكن لو مُت فقير حتكون هي دِه مشكلتك لأنك ماقدرتش تحقق حاجة ماقدرتش تغير من الواقع. غيرك ناس كتير بيتمنوا ولو جزء من اللي أنت فيه؛ من مشلول و معاق لفقير و برئ بياكل علقه من ابوه كل يوم. عندك طه حسين الأعمى اللي بقي عميد الأدب العربي. و عندك ستيفن هوكينز المشلول اللي بُقه بس اللي بيتحرك و قدر يبهر العالم كله بنظرياته و فكره. و عندك عباس العقاد اتولد في اسرة فقيرة لكن طلع و بقا من الأدباء اللي عمرنا محاننساهم طول عمرنا. و عندك العالم أينشتاين اللي اتولد بتوحد و قدر يغير مفهوم العالم عن العلم.
كل واحد له عيب مولود بيه ملازمه فأي مكان يروح حيلاقيه. العيب ده منغيره الإنسان حيعيش راضي و مبسوط و مكتفي. لازم تعرف ان عيبك ده هو الوقود اللي حيوصلك للي بتحلم بيه لأنك حتعيش طول حياتك عندك لازمه مفكراك أنت كنت مين و قيمتك الحقيقية ايه, لازمه بتقولك ان طريقك لسه طويل بتقولك انك مش معصوم من الخطأ انك مش معصوم من العيوب انك انك انسان و ماتتخدعش و ماتتغرش و تقول أنا بقيت سليم. لأن الإنسان بطابعه مغرور.
كل الناس متساويين, المتميز بنجاحه في مجال متميز بفشله في مجال اّخر.
